Музейная выстава “Лён у жыцці нашых продкаў”.
У бягучым навучальным годзе каманда вучняў “Фенікс” Лойкаўскай сярэдняй школы Гродзенскага раёна працягвае ўдзельнічаць у абласным турысцка-краязнаўчым праекце “Ад вытокаў да будучыні”.
На пачатку кастрычніка ў актавай зале была арганізавана музейная выстава “Лён у жыцці нашых продкаў”. “Пасееш лён – збярэш золата”, - кажуць людзі.На выставе былі прадстаўлены прылады працы, якія служылі для апрацоўкі льну: мялка, трапло, грабяні і шчоткі , прасніца,калаўрот, матавіла,прыстасаванні да кроснаў.
Асноўнай тканінай, якая выкарыстоўвалася пры пашыве беларускага народнага касцюма быў лён. Наведвальнікі выстаўкі мелі магчымасць убачыць узоры мужчынскай і жаночай вопраткі. Цікава, што ў нашай мясцовасці жанчыны насілі саматканыя спадніцы карычневага колеру,аздобленыя палоскамі. Спадніцу-андарак зберагла і перадала ў наш музей жыхарка вёскі Зарачанка Алешчык Зоф’я Аляксандраўна. Вучаніца 8 класа Калінская Таццяна паказала фартух, які ткала і вышывала яе бабуля Калінская Аліна Аляксандраўна.
Сярод льняных вырабаў традыцыйнага беларускага ткацтва варта ўвагі калекцыя ручнікоў- абрадавых, побытавых, дарожных...Самым высокім статусам надзяляўся набожнік –ручнік,якім упрыгожвалі абразы Чырвонага кута.
Лён і сёння з’яўляецца візітнай карткай Беларусі.Амаль кожны замежны турыст, вяртаючыся да дому, вязе з сабой сувенір з беларускага льну.
Удзел у музейнай выставе выклікаў у навучэнцаў зацікаўленасць да народных рамёстваў і беларускай культуры, пачуццё адказнасці за захаванне спадчыны малой радзімы.
Люцына Раманчук,
кіраўнік краязнаўчага музея “Вытокі”
