Дзень роднай мовы
Каб выхаваць ў падлеткаў павагу і любоў да роднага слова, цікавасць да твораў беларускіх пісьменнікаў, ужо некалькі год запар стала традыцыяй у Лойкаўскай сярэдняй школе святкаваць Міжнародны Дзень роднай мовы
У фае навучальнай установы размешчаны інфармацыйны стэнд, дзе асвечаны мерапрыемствы, якія будуць праводзіцца. У школьнай бібліятэцы была арганізавана выстава твораў класікаў, падрыхтаваны стэнд з выказваннямі вядомых беларусаў аб роднай мове.
Насычаным і цікавым быў дзень 21 лютага. Увазе вучняў была прапанавана разнастайная праграма з мэтай папулярызацыі беларускай мовы:
На працягу дня ў школе праходзіла акцыя “Размаўляй са мной па-беларуску”. Родная мова гучала ўсюды: у настаўніцкай, у школьнай сталоўцы, у майстэрні, у бібліятэцы…
- Вучням 1-2 класаў была прапанавана дэманстрацыя мультыплікацыйнага фільма (на беларускай мове) “Беларускія прымаўкі”.
- Вучні 3-4 класаў паказалі, што яны добра валодаюць майстэрствам выразнага чытання, артыстызмам. Вучні чыталі вершы беларускіх паэтаў.
- Дух спаборніцтва вітаў у час правядзення конкурснай праграмы паміж вучнямі 5-7 класаў “ Мова цікавая і займальная”
- Аднавіць і паглыбіць веды пра вусную народную творчасць змаглі вучні 8-9 класаў,адказваючы на пытанні віктарыны “Ад прадзедаў спакон вякоў мне засталася спадчына”.
Спадзяемся, што мерапрыемствы, якія былі прысвечаны беларускай мове, нікога не пакінулі абыякавымі, і, мы, настаўнікі Лойкаўскай сярэдняй школы, разам з нашымі вучнямі змаглі данесці да ўсіх тое, што павінна жыць у сэрцы кожнага беларуса, – гонар за сваю мову!
