Тыдзень беларускай мовы і літаратуры
Каб выхаваць у падлеткаў павагу і любоў да роднага слова, цікавасць да твораў беларускіх пісьменнікаў, ужо некалькі год запар стала традыцыяй у Лойкаўскай сярэдняй школе святкаваць Міжнародны Дзень роднай мовы.
У фае навучальнай установы размешчаны інфармацыйны стэнд, дзе асвечаны мерапрыемствы, якія будуць праводзіцца. У школьнай бібліятэцы была арганізавана выстава твораў класікаў, падрыхтаваны стэнд з выказваннямі вядомых беларусаў аб роднай мове.
Насычаным і цікавым быў дзень 21 лютага. Увазе вучняў была прапанавана разнастайная праграма з мэтай папулярызацыі беларускай мовы: вучні прынялі ўдзел у рэспубліканскім конкурсе “Буслік - 2019”, літаратурнай гасцёўні “У краіне роднай мовы”, літаратурна-музычнай імпрэзе “У родным краі – як у раі”.
На працягу тыдня ў школе праходзіла акцыя “Размаўляй са мной па-беларуску”. Родная мова гучала ўсюды: у настаўніцкай, у школьнай сталоўцы, у майстэрні, у бібліятэцы…
- Вучні 1-2 класаў прынялі ўдзел у выставе малюнкаў “Прырода роднага краю”.
- Вучні 3-4 класаў прадэманстравалі свае веды падчас гульні-спаборніцтва “Перакладчыкі”;
- Вучні 5-11 класаў паказалі, што яны добра валодаюць майстэрствам выразнага чытання, артыстызмам. Вучні чыталі вершы беларускіх паэтаў.
- Дух спаборніцтва вітаў у час правядзення конкурснай праграмы паміж вучнямі 5 і 6 класаў “ Мова цікавая і займальная”
- Вучні 8-11 класаў прынялі ўдзел у літаратурным рынгу па творчасці А.Куляшова “Што? Дзе? Калі?”.
- Вучні, настаўнікі і работнікі школы прынялі ўдзел у раённым этапе абласнога конкурса відэаролікаў “У краіне роднай мовы”.
Спадзяемся, што мерапрыемствы, якія былі прысвечаны беларускай мове, нікога не пакінулі абыякавымі, і, мы, настаўнікі Лойкаўскай сярэдняй школы, разам з нашымі вучнямі змаглі данесці да ўсіх тое, што павінна жыць у сэрцы кожнага беларуса, – гонар за сваю мову!
