Юныя экскурсаводы
“Лён у жыцці нашых продкаў” – так называлася выстава, якая ладзілася ў нашай установе адукацыі. Вучні 8 класа, члены аб’яднання па інтарэсах “Юныя экскурсаводы”, падрыхтавалі і правялі цікавую і змястоўную экскурсію пра лён.
Падчас экскурсіі Леашкевіч Максім паведаміў пра лён як расліну, якая любіць, каб яе добра даглядалі: палолі, падкормлівалі, а дзе трэба, і палівалі. Не дагледзіш як след — і знізіцца ўраджай, валакно будзе горшае.
Калінская Таццяна расказала пра саматканыя спадніцы, якія насілі жанчыны ў нашай мясцовасці. Вялікую каштоўнасць мае спадніца-андарак, якую зберагла ў сваім куфры і перадала ў наш музей жыхарка в. Зарачанка Алешчык Зоф’я Аляксандраўна. А таксама фартух, які ткала і вышывала бабуля дзяўчынкі Калінская Аліна Аляксандраўна.
Жук Ангеліна пазнаёміла з калекцыяй ручнікоў з бабулінага куфра Лойкаўскага краю - абрадавыя, побытавыя і дарожныя ручнікі.
Ваяводскі Аляксей адзначыў вялікую ролю арнамента ў беларускім касцюме. Гэта сімвалы, якія неслі акрэслены сэнс. Такія сімвалы маглі быць пажаданнем шчасця для маладых або абярэгам.
А Жук Аляксей расказаў, як у нашай мясцовасці называліся мужчынскія штаны - “нагавіцы”, “ганавіцы”, “порты”, “кроклы” ці “кроквы”. Кроклы, кроквы –хутчэй за ўсе ад слова “крок”.
Здаецца час спыніўся…
